KONFERENZA STAMPA

Christine Lagarde, President tal-BĊE,
Luis de Guindos, Viċi President tal-BĊE

Frankfurt am Main, 18 ta’ Lulju 2024

Il-wara nofsinhar it-tajjeb, il-Viċi President u jien nilqgħukom għal din il-konferenza stampa.

Il-Kunsill Governattiv illum iddeċieda li jżomm l-istess it-tliet rati ewlenin tal-imgħax tal-BĊE. L-informazzjoni li qed tasal tappoġġa b’mod estensiv il-valutazzjoni preċedenti tagħna tal-perspettiva tal-inflazzjoni fuq żmien medju. Filwaqt li xi miżuri ta’ inflazzjoni prinċipali żdiedu xi ftit f’Mejju minħabba fatturi ta’ darba, ħafna mill-miżuri jew kienu stabbli jew naqsu xi ftit f’Ġunju. B’mod konformi mal-aspettattivi, l-impatt inflazzjonarju ta’ żieda kbira fil-pagi trażżan mill-profitti. Il-politika monetarja qiegħda żżomm il-kundizzjonijiet ta’ finanzjament restrittivi. Fl-istess ħin, il-pressjonijiet fuq il-prezzijiet domestiċi għadhom għoljin, l-inflazzjoni fuq is-servizzi hija għolja u l-inflazzjoni globali hija mistennija li tibqa’ ogħla mill-mira tagħna tul parti sostanzjali mis-sena d-dieħla.

Aħna ddeterminati li niżguraw li l-inflazzjoni terġa’ lura għall-mira tagħna fi żmien medju ta’ tnejn fil-mija, b’mod f’waqtu. Se nżommu r-rati tal-politika restrittivi biżżejjed għal kemm ikun meħtieġ sabiex tinkiseb din il-mira. Se nkomplu nsegwu approċċ dipendenti mid-data u fuq bażi ta’ laqgħa b’laqgħa sabiex niddeterminaw il-livell xieraq u t-tul taż-żmien tat-restrizzjoni. B’mod partikolari, id-deċiżjonijiet tagħna dwar ir-rati tal-imgħax se jkunu bbażati fuq il-valutazzjoni tagħna tal-prospetti tal-inflazzjoni fid-dawl tad-data ekonomika u finanzjarja li ġejja, id-dinamika tal-inflazzjoni sottostanti, u s-saħħa tat-trażmissjoni tal-politika monetarja. M’aħniex qegħdin nintrabtu minn qabel dwar xi trajettorja partikolari għar-rati.

Id-deċiżjonijiet meħuda llum huma spjegati fi stqarrija għall-istampa disponibbli fis-sit web tagħna.

Issa se niddeskrivi f’aktar dettall kif naraw li se jiżviluppaw l-ekonomija u l-inflazzjoni, u mbagħad se nispjega l-valutazzjoni tagħna tal-kundizzjonijiet finanzjarji u monetarji.

Attività ekonomika

L-informazzjoni li qed tasal tindika li l-ekonomija taż-żona tal-euro kibret fit-tieni trimestru, imma aktarx b’pass aktar bil-mod milli fl-ewwel trimestru. Is-servizzi jkomplu jmexxu l-irkupru, filwaqt li l-produzzjoni industrijali u l-esportazzjonijiet ta’ prodotti kienu dgħajfin. L-indikaturi tal-investiment jindikaw tkabbir imrażżan fl-2024, fost inċertezza ogħla. Hekk kif inħarsu ’l quddiem, nistennew li l-irkupru se jkun appoġġat mill-konsum, xprunat mit-tisħiħ tal-introjtu reali li jirriżulta minn inflazzjoni aktar baxxa u pagi nominali ogħla. Barra minn hekk, l-esportazzjonijiet għandhom jirpiljaw id f’id ma’ żieda fid-domanda globali. Finalment, maż-żmien, il-politika monetarja għandha teżerċita inqas reżistenza għad-domanda.

Is-suq tax-xogħol jibqa’ reżiljenti. Ir-rata tal-qgħad bagħqet l-istess, b’rata ta’ 6.4 fil-mija f’Mejju, biex b’hekk baqgħet fl-aktar livell baxx sa mill-bidu tal-euro. Il-qgħad, li żdied b’0.3 fil-mija fl-ewwel trimestru, kien appoġġat minn żieda ulerjuri fil-forza tax-xogħol, li espandiet bl-istess rata. Aktarx li nħolqu aktar xogħolijiet fit-tieni trimestru, l-aktar fis-settur tas-servizzi. Id-ditti qegħdin gradwalment inaqqsu r-riklami għal postijiet tax-xogħol battala, imma minn livelli għoljin.

Il-politiki nazzjonali fiskali u strutturali għandhom ikunu mmirati lejn li jagħmlu l-ekonomija aktar produttiva u kompetittiva, u dan għandu jgħin biex jitnaqqsu l-pressjonijiet fuq il-prezzijiet fuq żmien medju. Implimentazzjoni effettiva, veloċi u sħiħa tal-programm Next Generation EU, il-progress lejn unjoni tas-swieq kapitali u t-tlestija tal-unjoni bankarja, kif ukoll it-tisħiħ tas-Suq Uniku huma fatturi ewlenin li għandhom jgħinu biex titrawwem l-innovazzjoni u jiżdied l-investiment fit-tranżizzjonijiet ekoloġiċi u diġitali. Aħna nilqgħu l-gwida reċenti mill-Kummissjoni Ewropea li ssejjaħ lill-Istati Membri tal-UE biex isaħħu s-sostenibbiltà fiskali u l-istqarrija tal-Eurogroup dwar il-pożizzjoni fiskali għaż-żona tal-euro fl-2025. L-implimentazzjoni tal-qafas ta’ governanza ekonomika rivedut tal-UE b’mod sħiħ u mingħajr dewmien se tgħin lill-gvernijiet inaqqsu d-defiċits baġitarji u l-proporzjonijiet tad-dejn fuq bażi sostnuta.

Inflazzjoni

L-inflazzjoni annwali naqset għal 2.5 fil-mija, minn 2.6 fil-mija f’Mejju. Il-prezzijiet tal-ikel żdiedu minn 2.4 fil-mija f’Ġunju – li huwa 0.2 punti perċentwali inqas milli f’Mejju – filwaqt li l-prezzijiet tal-enerġija baqgħu essenzjalment l-istess. Kemm l-inflazzjoni fil-prezzijiet tal-prodotti kif ukoll l-inflazzjoni fil-prezzijiet tas-servizzi baqgħu l-istess f’Ġunju, jiġifieri 0.7% u 4.1% rispettivament. Filwaqt li xi miżuri tal-inflazzjoni sottostanti żdiedu xi ftit f’Mejju minħabba fatturi ta’ darba, ħafna mill-miżuri jew kienu stabbli jew naqsu xi ftit f’Ġunju.

L-inflazzjoni domestika tibqa’ għolja. Il-pagi qegħdin jiżdiedu b’ritmu elevat, li qiegħed ipatti għall-perjodu fil-passat ta’ inflazzjoni għolja. Il-pagi nominali ogħla, flimkien mal-produttività baxxa, żiedu mat-tkabbir tal-ispejjeż għal kull unità tax-xogħol, għalkemm dan naqqas kemmxejn fir-ritmu fl-ewwel trimestru ta’ din is-sena. Minħabba n-natura fi stadji tal-aġġustamenti tal-pagi u l-kontribut kbir ta’ ħlasijiet ta’ darba, iż-żieda fl-ispejjeż tax-xogħol aktarx li se jibqgħu elevati fit-terminu fil-qrib. Fl-istess ħin, id-data reċenti dwar il-kumpens għal kull impjegat kienet konformi mal-aspettattivi u l-aħħar indikaturi tal-istħarriġ jindikaw li ż-żieda fil-pagi se timmodera matul is-sena d-dieħla. Barra minn hekk, il-profitti kkuntrattati fl-ewwel trimestru, li jgħinu biex ipattu għall-effetti inflazzjonarji ta’ kostijiet ogħla għal kull unità ta' xogħol, u l-evidenza mill-istħarriġ jissuġġerixxu li l-profitti se jkomplu jkunu mrażżna fil-perjodu fil-qrib.

L-inflazzjoni hija mistennija li tvarja madwar il-livelli attwali għall-kumplament tas-sena, parzjalment minħabba effetti bażi relatati mal-enerġija. Imbagħad hija mistennija li tonqos lejn il-mira tagħna matul it-tieni nofs tas-sena, minħabba żieda aktar dgħajfa fl-ispejjeż tax-xogħol, l-effetti tal-politika monetarja restrittiva tagħna u l-impatt li qed ibatti taż-żieda f’daqqa fl-inflazzjoni li seħħet fil-passat. Il-miżuri tal-aspettattivi inflazzjonarji aktar fit-tul jibqgħu ġeneralment stabbli, bil-biċċa l-kbira jkunu ta’ madwar 2 fil-mija.

Valutazzjoni tar-riskji

Ir-riskji għat-tkabbir ekonomiku ixaqilbu lejn it-tnaqqis. Ekonomija dinjija aktar dgħajfa jew eskalazzjoni fit-tensjonijiet tal-kummerċ bejn l-ekonomiji ewlenin tkun ta’ piż fuq it-tkabbir taż-żona tal-euro. Il-gwerra mhux ġustifikata tar-Russja kontra l-Ukrajna u l-kunflitt traġiku fil-Lvant Nofsani huma sorsi ewlenin ta’ riskju ġeopolitiku. Dan jista’ jwassal biex id-ditti u l-unitajiet domestiċi jsiru inqas kunfidenti dwar il-futur u li jiġi mfixkel il-kummerċ globali. It-tkabbir jista’ jkun ukoll aktar baxx jekk l-effetti tal-politika monetarja jirriżultaw li huma aktar b’saħħithom milli mistenni. It-tkabbir jista’ jkun ogħla jekk l-inflazzjoni tonqos aktar malajr milli mistenni u ż-żieda fil-kunfidenza u d-dħul reali tkun tfisser li l-infiq jiżdied b’aktar milli huwa antiċipat, jew jekk l-ekonomija dinjija tikber b’mod aktar b’saħħtu milli mistenni.

L-inflazzjoni tista’ tkun ogħla milli mistenni jekk il-pagi jew il-profitti jiżdiedu b’aktar milli huwa mistenni. Ir-riskji ta’ żieda fl-inflazzjoni jirriżultaw ukoll mit-tensjonijiet ġeopolitiċi li qegħdin jiżdiedu, li jistgħu jgħollu l-prezzijiet tal-enerġija u l-ispejjeż tal-merkanzija fuq perjodu fil-qrib u jfixklu l-kummerċ globali. Barra minn hekk, l-avvenimenti ta’ temp estrem, u l-kriżi tal-klima li qiegħda tiżvolġi b’mod aktar ġenerali, jistgħu jgħollu l-prezzijiet tal-ikel. B’kuntrast, l-inflazzjoni tista’ tkun anqas milli mistenni jekk il-politika monetarja trażżan id-domanda aktar milli mistenni, jew jekk l-ambjent ekonomiku fil-bqija tad-dinja jmur għall-agħar b’mod mhux mistenni.

Kundizzjonijiet finanzjarji u monetarji

It-tnaqqis fir-rata tal-politika f’Ġunju ġiet trażmessa bla xkiel lejn ir-rati tal-imgħax tas-suq monetarju, filwaqt li l-kundizzjonijiet ta’ finanzjament aktar wiesgħin kienu kemmxejn volatili. L-ispejjeż ta’ finanzjament jibqgħu restrittivi peress li ż-żidiet preċedenti tagħna fir-rata tal-politika jkomplu jinfiltraw fil-katina ta’ trażmissjoni. Ir-rata tal-imgħax medja fuq self ġdid lil ditti naqset kemmxejn għal 5.1 fil-mija f’Mejju, filwaqt li r-rati tas-self domestiku baqgħu l-istess b’rata ta’ 3.8 fil-mija.

L-istandards ta’ kreditu għas-self jibqgħu stretti. Skont l-aħħar stħarriġ dwar it-tislif mill-banek, l-istandards għat-tislif lid-ditti ssikkaw kemmxejn fit-tieni trimestru, filwaqt li l-istandards għas-self domestiku llaxkaw b’mod moderat. Id-domanda tad-ditti għal self naqset kemmxejn, filwaqt li d-domanda mill-unitajiet domestiċi għal self domestiku żdiedet għall-ewwel darba sa mill-bidu tal-2022.

B’mod ġenerali, id-dinamiċi tal-kreditu jibqgħu dgħajfin. Is-self mill-banek lill-kumpaniji żdied b’rata annwali ta’ 0.3 fil-mija f’Mejju, kemmxejn ogħla mix-xahar ta’ qabel. It-tkabbir annwali fl-aggregat monetarju wiesa’ – kif imkejjel minn M3 – żdied għal 1.6 fil-mija f’Mejju minn 1.3 fil-mija f’April.

Konklużjoni

Il-Kunsill Governattiv illum iddeċieda li jżomm l-istess it-tliet rati ewlenin tal-imgħax tal-BĊE. Aħna ddeterminati li niżguraw li l-inflazzjoni terġa’ lura għall-mira tagħna fi żmien medju ta’ tnejn fil-mija, b’mod f’waqtu. Se nżommu r-rati tal-politika restrittivi biżżejjed għal kemm ikun meħtieġ sabiex tinkiseb din il-mira. Se nkomplu nsegwu approċċ dipendenti mid-data u fuq bażi ta’ laqgħa b’laqgħa sabiex niddeterminaw il-livell xieraq u t-tul taż-żmien tat-restrizzjoni. B’mod partikolari, id-deċiżjonijiet tagħna dwar ir-rati tal-imgħax se jkunu bbażati fuq il-valutazzjoni tagħna tal-prospetti tal-inflazzjoni fid-dawl tad-data ekonomika u finanzjarja li ġejja, id-dinamika tal-inflazzjoni sottostanti, u s-saħħa tat-trażmissjoni tal-politika monetarja. M’aħniex qegħdin nintrabtu minn qabel dwar xi trajettorja partikolari għar-rati.

Fi kwalunkwe każ, aħna lesti li naġġustaw l-istrumenti kollha tagħna fi ħdan il-mandat tagħna biex niżguraw li l-inflazzjoni terġa’ lura għall-mira tagħna għal żmien medju u li nippreżervaw il-funzjonament bla xkiel tat-trażmissjoni tal-politika monetarja.

Issa ninsabu lesti biex inwieġbu l-mistoqsijiet tagħkom.

Għall-kliem eżatt miftiehem mill-Kunsill Governattiv, jekk jogħġbok ara l-verżjoni bl-Ingliż.