Deċiżjonijiet tal-politika monetarja

18 ta' Lulju 2024

Il-Kunsill Governattiv illum iddeċieda li ma jagħmel ebda bidla fit-tliet rati ewlenin tal-imgħax tal-BĊE. L-informazzjoni li qed tasal tappoġġa b’mod estensiv il-valutazzjoni preċedenti tal-Kunsill Governattiv tal-perspettiva tal-inflazzjoni fuq żmien medju. Filwaqt li xi miżuri ta’ inflazzjoni prinċipali kienu preżenti f’Mejju minħabba fatturi ta’ darba, ħafna mill-miżuri kienu jew stabbli jew naqsu f’Ġunju. B’mod konformi mal-aspettattivi, l-impatt inflazzjonarju ta’ żieda kbira fil-pagi trażżan mill-profitti. Il-politika monetarja qiegħda żżomm il-kundizzjonijiet ta’ finanzjament restrittivi. Fl-istess ħin, il-pressjonijiet tal-prezzijiet domestiċi għadhom għoljin, l-inflazzjoni tas-servizzi hija għolja u l-inflazzjoni globali hija probabbli li tibqa’ ogħla mill-mira tul parti sostanzjali tas-sena d-dieħla.

Il-Kunsill Governattiv huwa ddeterminat li jiżgura li l-inflazzjoni tirritorna għall-mira fuq perjodu ta’ żmien medju tiegħu ta’ 2 % kif ippjanat. Se jżomm ir-rati tal-politika restrittivi biżżejjed għal kemm ikun meħtieġ sabiex jinkiseb dan il-għan. Il-Kunsill Governattiv se jkompli jsegwi approċċ dipendenti fuq id-data u fuq bażi ta’ laqgħa b’laqgħa sabiex jiddetermina l-livell xieraq u t-tul taż-żmien tar-restrizzjoni. B’mod partikolari, id-deċiżjonijiet tiegħu fuq ir-rati tal-imgħax se jkunu bbażati fuq il-valutazzjoni tiegħu tal-perspettiva dwar l-inflazzjoni fid-dawl tad-data ekonomika u finanzjarja li ġejja, id-dinamiċi tal-inflazzjoni sottostanti, u s-saħħa tat-trażmissjoni tal-politika monetarja. Il-Kunsill Governattiv ma huwa qed jikkommetti ruħu għal ebda direzzjoni partikolari fir-rata.

Rati tal-imgħax ewlenin tal-BĊE

Ir-rata tal-imgħax fuq l-operazzjonijiet ewlenin ta’ rifinanzjament u r-rati fuq il-faċilità ta’ self marġinali u l-faċilità tad-depożitu jibqgħu l-istess f’4.25 %, 4.50 % u 3.75 % rispettivament.

Il-programm ta' xiri ta' assi (APP) u l-programm ta' xiri għall-emerġenza pandemika (PEPP)

Il-portafoll tal-APP qiegħed jonqos b’ritmu meqjus u prevedibbli, hekk kif l-Eurosistema mhux qed terġa’ tinvesti l-pagamenti prinċipali mit-titoli li jimmaturaw.

L-Eurosistema ma għadhiex tinvesti mill-ġdid il-pagamenti prinċipali kollha minn titoli li jimmaturaw mixtrija taħt il-PEPP, u dan naqqas, bħala medja, il-portafoll tal-PEPP b’€7.5 biljun fix-xahar. Il-Kunsill Governattiv biħsiebu jwaqqaf l-investimenti mill-ġdid taħt il-PEPP fit-tmiem tal-2024.

Il-Kunsill Governattiv, għalhekk, se jkompli japplika flessibbiltà fl-investiment mill-ġdid ta’ tifdijiet li se jkunu dovuti fil-portafoll tal-PEPP, bil-ħsieb li jiġu miġġielda r-riskji għall-mekkaniżmu ta’ trażmissjoni relatati mal-pandemija.

Operazzjonijiet ta rifinanzjament

Hekk kif il-banek qegħdin iħallsu lura l-ammonti li sselfu taħt l-operazzjonijiet ta’ rifinanzjament fuq perjodu ta’ żminijiet itwal fil-mira, il-Kunsill Governattiv se jivvaluta b’mod regolari kif operazzjonijiet ta’ self fil-mira u r-ripagamenti li qegħdin jagħmlu qed jikkontribwixxu għall-pożizzjoni tal-politika monetarja tiegħu.

***

Il-Kunsill Governattiv huwa lest li jaġġusta l-istrumenti kollha tiegħu fi ħdan il-mandat tiegħu biex jiżgura li l-inflazzjoni terġa’ lura għall-mira tiegħu ta’ 2 % fuq perjodu ta’ żmien medju u biex jiġi ppreżervat il-funzjonament bla xkiel tat-trażmissjoni tal-politika monetarja. Barra minn hekk, l-Istrument ta’ Protezzjoni tat-Trasmissjoni huwa disponibbli biex jagħmel tajjeb għal dinamiċi tas-suq mhux mixtieqa u mhux organizzati li joħolqu theddida serja għat-trasmissjoni tal-politika monetarja fost il-pajjiżi kollha taż-żona tal-euro, b’hekk jippermetti lill-Kunsill Governattiv biex jikseb riżultati b’mod aktar effettiv fuq il-mandat tal-istabbiltà tal- prezzijiet tiegħu.

Il-President tal-BĊE se jagħti l-fehmiet tiegħu fuq ir-raġunijiet li wasslu għal dawn id-deċiżjonijiet f’konferenza stampa li tibda fis-14:45 CET illum.

Għall-kliem eżatt miftiehem mill-Kunsill Governattiv, jekk jogħġbok ara l-verżjoni bl-Ingliż.