Skema tas-sottoskrizzjonijiet għall-kapital tal-BĊE - tkabbir ta' l-UE u ta' l-Eurosistema

Skond l-Artikolu 29 ta’ l-Istatut tas-Sistema Ewropea ta’ Banek Ċentrali u tal-Bank Ċentrali Ewropew, l-ishma tal-banek ċentrali nazzjonali (BĊN) fl-iskema kapitali tal-BĊE huma ppeżati skond l-ishma ta’ l-Istati Membri rispettivi fit-total tal-popolazzjoni u tal-prodott gross domestiku ta’ l-UE, fi proporzjon ugwali, skond kif innotifikat mill-Kummissjoni Ewropea lill-BĊE. Dan l-ippeżar jiġi aġġustat kull ħames snin u kull meta Stati Membri ġodda jissieħbu ma’ l-UE, u għalhekk l-aħħar darba li dan inbidel kien fl-1 ta' Mejju 2004 meta għaxar Stati Membri ġodda ssieħbu ma’ l-UE.

Fl-1 ta’ Jannar 2007, l-iskema kapitali tal-BĊE ġiet mibdula minħabba li l-Bulgarian National Bank u l- Banca Naþionalã a României ssieħbu mas-Sistema Ewropea ta’ Banek Ċentrali (SEBĊ). L-ishma l-ġodda tal-BĊN fl-iskema kapitali huma elenkati hawn taħt.

Skond l-Artikolu 49.3 ta’ l-Istatut, il-kapital sottoskritt tal-BĊE jiġi miżjud awtomatikament meta Stat Membru ġdid jissieħeb ma’ l-UE u l-BĊN tiegħu jissieħeb mas-SEBĊ. Iż-żieda tiġi ddeterminata billi jiġi mmultiplikat l-ammont attwali tal-kapital sottoskritt (jiġifieri EUR 5,565,000,000) mal-proporzjon, fil-limiti ta’ l-iskema kapitali miżjuda, bejn il-peżaturi tal-BĊN li jkun(u) qed jissieħbu u l-peżaturi ta’ dawk il-BĊN li jkunu diġà membri tas-SEBĊ. Għalhekk, fl-1 ta’ Jannar 2007, il-kapital sottoskritt tal-BĊE ġie miżjud għal EUR 5,760,652,402.58.

Barra dan, fl-1 ta’ Jannar 2007, is-Slovenja adottat l-euro u l-Banka Slovenije ssieħeb ma’ l-Eurosistema. Skond l-Artikolu 49 ta’ l-Istatut, il-Banka Slovenije ħallas il-bqija tal-kontribut tiegħu għall-kapital tal-BĊE fl-1 ta’ Jannar 2007. Il-BĊN ta’ l-Eurosistema għandhom iħallsu l-kapital kollu sottoskritt minnhom. L-14-il BĊN li m’humiex fiż-żona ta’ l-euro (il-grupp preċedenti ta’ 12-il BĊN li mhumiex fiż-żona ta’ l-euro kif ukoll il-Bulgarian National Bank u l-Banca Naþionalã a României) huma meħtieġa jħallsu perċentwal minimu tal-kapital sottoskritt minnhom (7% fl-1 ta’ Jannar 2007) bħala kontribut għall-ispejjeż operazzjonali tal-BĊE.

Id-Deċiżjonijiet rilevanti tal-BĊE huma disponibbli fuq il-website tal-BĊE u se jiġu ppubblikati fil-Ġurnal Uffiċjali ta’ l-Unjoni Ewropea fi żmien xieraq.