26 ta’ April 2004

B’mod konformi ma’ l-Artikolu 29 ta’ l-Istatut tas-Sistema Ewropea tal-Banek Ċentrali (SEBĊ) u tal-Bank Ċentrali Ewropew (BĊE), l-ishma tal-banek ċentrali nazzjonali (BĊN) fl-iskema kapitali tal-BĊE huma ppeżati skond l-ishma li kull wieħed mill-Istati Membri in kwistjoni għandu fit-total tal-popolazzjoni u l-prodott gross domestiku ta’ l-UE, fi proporzjon ugwali, skond kif il-Kummissjoni Ewropea nnotifikat lill-BĊE. Dawn il-peżaturi jiġu rreveduti kull ħames snin u kienu ġew mibdula l-aħħar fl-1 ta’ Jannar 2004.

Fl-1 ta’ Mejju 2004 l-iskema kapitali tal-BĊE ser tiżdied, hekk kif għaxar Stati Membri ġodda ser jissieħbu ma’ l-UE. L-ishma l-ġodda tal-BĊN fl-iskema kapitali huma elenkati fuq il-paġna li jmiss.

Skond l-Artikolu 49.3 ta’ l-Istatut ta’ l-SEBĊ, li kien ġie miżjud ma’ l-Istatut permezz tat-Trattat ta’ Adżejoni, il-kapital sottoskritt tal-BĊE jiġi awtomatikament miżjud meta Stat Membru ġdid jissieħeb ma’ l-UE u l-BĊN tiegħu isir parti mill-SEBĊ. Iż-żieda tiġi ddeterminata billi jiġi mmultiplikat l-ammont fis-seħħ tal-kapital sottoskritt (5,000 miljun ewro) mal-proporzjon, fil-limiti ta’ l-iskema kapitali miżjuda, bejn il-peżaturi tal-BĊN li jkunu qed jissieħbu u l-peżaturi ta’ dawk il-BĊN li jkunu diġà membri ta’ l-SEBĊ. Għalekk, fl-1 ta’ Mejju 2004 il-kapital sottoskritt tal-BĊE ser jiżdied għal EUR 5,564,669,247.

Il-BĊN ta’ l-Eurosistema huma meħtieġa li jħallsu l-kapital sottoskritt tagħhom kollu. It-13-il BĊN li m’humiex fiż-żona ta’ l-ewro (l-għaxar BĊN, id-Danmarks Nationalbank, l-Isveriges Riksbank u l-Bank of England) huma meħtieġa li jħallsu persentaġġ minimu tal-kapital sottoskritt tagħhom (7% li jkun jgħodd mill-1 ta’ Mejju 2004) bhala kontribut għall-ispejjeż operazzjonali tal-BĊE.

Id-deċiżjonijiet tal-BĊE illi huma relevanti jistgħu jinstabu fuq il-website tal-BĊE u għandhom jiġu ppubblikati fil-Ġurnal Uffiċjali tal-Unjoni Ewropea fi żmien xieraq.